पुस्तकको बारेमा
वि. सं २०६१ मा प्रकाशित नियात्रासङ्ग्रह ‘प्रशान्तका छालहरूमा मेरो नेपाल’ मा उनका अमेरिकासम्बन्धी चार, बेलायतसम्बन्धी एक, जापानसम्बन्धी एक र पपुआ न्युगिनीसम्बन्धी दुई रचना छन् । उनी अमेरिका र बेलायतमा त्यहाँका विश्वविद्यालयहरूमा अध्ययनका लागि गएका थिए भने जापानमा एउटा तालीममा पुगेका थिए । पपुआ न्युगिनीमा भने उनी त्यहाँको अर्थ मन्त्रालयमा अन्तर्राष्ट्रिय सल्लाहकार थिए ।
यस कृतिको प्रकाशन भएदेखि नै विकास अर्थशास्त्री चन्द्रप्रसाद भट्टराईले नियाक्रा विधामा आफ्नो सशत्त उपस्थिति जनाएका छन् । त्यसपछि उनका ‘अनौठो मुलुक अनौठा अनुभूति’ (२०७१) र ‘नीला गोलार्द्ध’ (२०७६) नामका दुइटा नियात्रासङ्ग्रह प्रकाशित छन् । हाल उनी नियात्रा समाज नेपालका अध्यक्ष छन् ।
‘प्रशान्तका छालहरूमा मेरो नेपाल’को भूमिकामा वरिष्ठ नियात्राकार डा तारानाथ शर्मा लेख्नुहुन्छ :
“भट्टराईका यी यात्रावर्णनका अनेकौं विशेषताहरूमध्ये दुइटालाई चाहिँ मैले प्रमुख मानेको छु । पहिलो विशेषता अन्तर्गत उनी जहाँ गए पनि र जहाँ पुगे पनि नेपालको सम्झनालाई निरन्तर सँगै राखिछाड्छन् र त्यसै हुनाले लेखक हरेक स्थान, घटना, दृश्य र व्यक्तिसित साक्षात्कार हुनेबित्तिकै नेपालका त्यस्तै स्थान, घटना, दृश्य र व्यक्तिसित भावालोडित तुलना गर्न पुगिहाल्छन् । मातृभूमिप्रतिको यही अगाध आस्थाले गर्दा यी यात्रावर्णन अविस्मरणीय हुन पुगेका छन् ।
यस पुस्तकको दोस्रो विशेषता चाहिँ आफूले वर्णन गरेका पात्रहरूसँग होस् वा दृश्यहरूसँग होस् पाठकलाई समेत प्रभावित पार्दै त्यहीँ पुर्याउन सक्नु र साक्षात्कार गराएझैँ भावविह्वल तुल्याउन सक्नु हो । यिनै विशेषताहरूले गर्दा भट्टराईका यी रचना नियात्राका रूपमा प्रतिष्ठित र प्रशंसित हुने छन् ।
तथ्यहरूको सूची दिने वस्तुपरक शैलीलाई नअँगाली लेखकले बालसुलभ उत्सुकताका साथ नयाँनयाँ कुराको उद्घाटन गर्दै लगेका छन् र पाठकहरूलाई पनि त्यस्ता रोचक परिचयमा आफ्नै जस्ता अनुभूति दिँदै सँगसँगै हिँडाएका र सोचाएका छन् ।”
