प्रवाह नदीको प्रयोजन हो । आफ्नो अस्तित्वका निम्ति बग्नु उसको अनिवार्यता तर नदीको ऐश्वर्य त उसको त्यो निर्झरता हो, उसले दिने अतिरिक्त मूल्य । यही अतिरिक्त मूल्यले नै कुनै चिजलाई सौन्दर्य प्रदान गर्दछ । जहाँ प्रयोजन समाप्त हुन्छ, त्यहाँ सौन्दर्य सुरु हुन्छ ।
- अमृतलाल बेगड 
(सौन्दर्य की नदी नर्मदा)

गीताको गीतकार, कथाकार, निबन्धकार, कवि, समालोचक प्रतिभाको संयोगले नै यी निबन्धहरू यति सुललित, सशक्त र सन्देशमूलक भएका हुन् । यिनको सबभन्दा ठूलो विशेषता हो- स्वाभाविकता जुन यिनको स्रष्टा व्यक्तित्व जस्तै टड्कारो छ । यस सङ्ग्रहका सबै निबन्धहरू गीताका भावनात्मक उत्कृष्टताका नमुना हुन् । सरल भाषामा व्यक्त गहन विचार यी निबन्धहरूको विशेषता हो।
- जगदीश घिमिरे

मलाई लाग्छ- कवितालाई फिंजाएपछि निबन्ध बन्छ । अथवा यसरी भनिदिऊँ- निबन्धले लगाएका ज्याकेटहरू एकान्तमा बसेर कलात्मक ढङ्गले खोल्दै जाने हो भने अन्तमा कविता निस्कन्छ । निस्केन भने त्यो निबन्ध होइन । हाम्रो महान् निबन्ध परम्पराले हामीलाई सिकाएको त्यही छ । गीता त्रिपाठी एक भावुक कवि र नामी गीतकार पनि हुन् । उनका निबन्धहरूको अन्तर्लयमा गीत भेटिन्छ र निबन्धको आत्मानेर पुगेपछि भेटिन्छ- काव्य । त्यसैले शब्दको खास स्वाद यहाँ छ।
उनलाई पढ्दा पढ्दै लाग्छ- यौटा कलाकारको हातमा शब्दहरू काँप्छन् । ती भत्कन्छन् र तिनको आन्तरिक सौन्दर्य बाहिर देखिन्छ । गीताका निबन्धहरूको माझमा पसेपछि जता फर्के। पनि सौन्दर्यको माझमा छु भन्ने आभास हुन्छ । त्यसको कारण उनका प्रकम्पित शब्दहरू नै हुन् । उनका गहिरा चिन्तनहरू कहिल्यै एक्ला छैनन् । विचारको वरिपरि विचारकै ओज छ । हदयमा आएर बास बस्ने विचारहरू सायद त्यसरी नै आउँछन् । गीत, कविता र निबन्ध एकैपटक यसरी पढ्न पाउनु दुर्लभ छ । उनका अति शान्त र विप्लवी क्षणहरूको प्रतिविम्बमा धेरैपटक आफूलाई भेट्न सकिन्छ- आफ्नै गीत र आफ्नै कवितासहित । यो समयको निबन्ध खोज्नुपरे सरल भाषामा लेखिएका गीता त्रिपाठीका निबन्धहरू उदाहरण हुन सक्छन् ।
 - मनु मन्जिल