चोरी गरेको अभियोगमा शूद्रको अपराध आठगुणा हुन्छ, वैश्यले गरेमा त्यसको अपराध सोह्रगुणा, क्षत्रियले गरे बत्तीसगुणा हुन्छ । त्यस्तै, ब्राह्मणले गरे चौसट्ठीगुणा वा सयगुणा हुन्छ । चोरीको अपराधको प्रकृति जानेरै गरेको छ भने त्यस्तो ब्राह्मणको दोष १२८ गुणा हुन्छ । हिन्दुधर्मग्रन्थले चारवटै वर्णकर्म मध्ये ब्राह्मणकर्मलाई सबैभन्दा बढी र त्यसपछि क्षत्रियकर्मलाई जिम्मेवार बनाएको छ । वर्तमान समयमा यस्तो नियम पारदर्शी रूपमा लागु हुने हो भने ब्राह्मण हुन चाहने मानिस बिरलै भेटिनेछन् ।

ooo

यस पुस्तकले हाम्रा शास्त्रहरू र हामीले अनुसरण गरेको परम्पराको बहुपक्षीय ज्ञान दिन्छ । प्रकृति र ईश्वरसँगको मानवीय अन्तरसम्बन्ध, दर्शन र विज्ञानको तादम्यता, भाषा र साहित्यको क्रमिक विकास, धर्म र पन्थहरूबीचको फरक र हामीले अनुसरण गर्ने सही बाटो, वर्णाश्रम र जातजातिको यथार्थ व्याख्या, राजनीतिले धर्म माथि पारेको प्रभाव र पाश्चात्य शिक्षा र संस्कृतिबाट परेको नकारात्मक प्रभाव सम्बन्धी सटीक तर्क र विवेचना यस पुस्तकमा पाइन्छ । पुस्तक सरल छ, तार्किक छ, खरो प्रस्तुति छ र प्रामाणिक व्याख्याहरूले भरिएको छ । यो पुस्तक पढेपछि जो कोहीको पनि धर्म र कर्म प्रतिको सोचमा केही न केही परिवर्तन ल्याउन सक्छ ।

- खेमराज नेपाल