राजीवका कविताहरूमा नेपालको सामाजिक यथार्थताको अभिव्यक्ति पाइन्छ । समाजमा रहेका आर्थिक, राजनैतिक, सामाजिक र सांस्कृतिक उत्पीडनलाई उनले 'कमिनी आमा' कवितासङ्ग्रहमा अत्यन्त मर्मस्पर्शी अभिव्यक्ति दिएका छन् । -अमर गिरी
कवि राजीवको 'कमिनी आमा' कवितासङ्ग्रहमा एकातर्फ नेपाल राष्ट्रप्रतिको गहिरो प्रेम प्रकट भएको छ भने अर्कातर्फ नेपाली समाजमा विद्यमान सामाजिक तथा आर्थिक विभेदलाई भस्मीभूत पार्ने आग्नेय अभिव्यक्तिको दनदनाउँदो ज्वाला भेटिन्छ ।

    - प्रा.डा. महादेव अवस्थी

कवि राजीवले 'कमिनी आमा' कवितासङ्ग्रहमा विद्रोह, आशा, परिवर्तन, श्रम, राष्ट्रियता र शोषणलाई कविताको विषय बनाएका छन् । सामन्ती र पूँजीवादी विकृतिप्रति उनको तीव्र विरोध छ । शैली सरल छ । विम्ब र प्रतीकहरू भाव सम्प्रेषण गर्न सफल छन् ।

- घनश्याम ढकाल

मान्छेप्रतिको प्रगाढ विश्वास र विश्वमानवताप्रतिको आस्था तथा श्रमजीवी मान्छेको सौन्दर्यभन्दा उच्च सौन्दर्य अर्को हुँदैन भन्ने सौन्दर्यदृष्टि नै 'कमिनी आमा' कवितासङ्ग्रहका कविताको प्राण हो ।

  -रामप्रसाद ज्ञवाली

सर्वसाधारण जनताले सजिलै बुझ्ने भाषामा पनि उच्च कविता लेख्न सकिन्छ भन्ने

नमुना खोज्नुपरे 'कमिनी आमा' पढे पुग्छ ।

-मित्रलाल पंज्ञानी