‘ब्याकफायर इन नेपालः हाउ इन्डिया लस्ट द प्लट टू चाइना’लगायत पुस्तक लेखेका उपाध्याय आफ्नो परिचय खुलस्त पारेको पुस्तक ‘इम्पावर्ड एन्ड इम्पेरिल्डः नेपाल्स पिस पजल इन बिट्स एन्ड पिसेस’मा लेख्छन्, ‘जब मैले ब्लग लेख्न सुरु गर्दै थिएँ, त्यतिखेर राजा ज्ञानेन्द्रको शाहीशासन चरम स्थितिमा थियो । सात पार्टीको गठबन्धन र माओवादीबीच बाह्रबुँदे सहमतिमा हस्ताक्षर भएको थियो । तर धेरै कुरा अस्पष्ट थिए । भूराजनीति, सार्वजनिक विचार, आशा, निराशा— अनुमान लगाउन नसकिने कुरा थुप्रै थिए । शाही प्रतिगमनको ‘न्यारेटिभ’ जति बलियो भए पनि मैले त्यसलाई कहिल्यै विश्वास गरिनँ, अहिले पनि गर्दिनँ । कसैलाई पनि राम्रो नहुने गरी हाम्रो त्रिपक्षीय लडाइँ धेरै लम्बिएको थियो ।