'युद्धमा डामिएको मन' रोल्पाली भावभूमिमा डायरी - शैलीमा उद्भव भएको खाट्टी कहानी हो । यो पुस्तक रोल्पाली जनजीवनलाई नियाल्न सकिने सुन्दर झ्याल हो जहाँबाट पाठकले युद्धको आँधीले विचलित भूगोल, निर्दोष समुदाय र अभावको बगरमा गुज्रिएको माटोको जीवन्त चित्र देख्नसक्छन् । एक राष्ट्रसेवक कर्मचारी फरक भाषा, रीतिरिवाज, संस्कार र आर्थिक जीवनको पहेलीमा बाँचेका समुदायसँग जोडिएर कसरी सत्कर्म गर्नसक्छ ? उनीहरूसँगसँगै भावनाको गहिरो समुद्रमा कसरी सम्मिलन हुनसक्छ ? नयाँ कारिन्दालाई नौलो भूगोलमा युद्धसङ्क्रमित राजनीतिक आँधीले कसरी तारो बनाउँछ ? यी यावत प्रश्नको साहसिक उत्तर पढ्न पाइन्छ यस पुस्तकमा । रोल्पाली भूगोल, संस्कार र समाजको चित्रलाई स्वतन्त्र रूपमा उतारिएको यो पुस्तकमा निर्दोष गाउँलेहरूले युद्धको आँधीबीचमा भोगेका चुनौतीका फेहरिस्त पढ्न सकिन्छ र यसले गहिराइमा 'यदि बेलैमा युद्धको विषालु बिरुवा उखेलिएन भने यसले जनसमुदायको अस्तित्वलाई हुर्मत लिन्छ' भन्ने भाव सम्प्रेषण गरेको छ । युद्धआँधीको दुईधारे तरबार र त्यसको समाप्तिपछि पनि त्यहाँ पलाउन नसकेको रूपान्तरणको पालुवालाई यस पुस्तकमा पढ्न पाइन्छ । ग्रामीण मान्छेका निर्दोषपन, बेलाबेला त्यहाँ ठोक्किने प्राकृतिक प्रकोप, आर्थिक कठिनाइ र व्यक्तिगत क्षतिको सामना गर्ने आत्मबलको कहानीयुक्त महाकाव्य हो यो पुस्तक । काव्यात्मक शैलीमा लेखिएको यो पुस्तक ग्रामीण जीवनको सुन्दरता, नरनारीका कथा, पारिवारिक विरासत र दैनिक अनुभवहरू समेटिएको कलमले खिचेको सुन्दर कथा भएको डकुमेन्ट्री चलचित्रजस्तै हो । वर्णनात्मक भाषामा युद्धकालीन रोल्पाली गाउँको जीवन्त र तटस्थ कहानी पढ्न चाहने जोसुकैका लागि यो पुस्तक चकलेटी खजाना हो ।