राजेन्द्र कार्की

काठमाडौंको बानेश्वरमा स्थायी बसोबास भएका राजेन्द्र कार्की भोजपुरको दावामा जन्मिनु भएको हो । निबन्ध लेखनमा दखल राख्ने कार्की परदेशमा बसेर पनि नेपाली भाषा, साहित्यमा कलम चलाउँदै आउनु भएको छ । उहाँको 'निरीह देउता' कविता सङ्ग्रह प्रकाशनको प्रतीक्षामा छ । काठमाडौलाई तीस वर्ष कर्मथलो बनाएर कार्कीले जीवनको रथ चलाउनु भयो । उहाँ हाल क्यानडाको म्याकुभरमा जीवन र लेखन कर्ममा सक्रिय रहँदै आउनु भएको छ ।

"निबन्धहरुमा विषय प्रस्तुति र व्यङ्ग्यका घच्काहरु साँच्चै स्वादिला छन् । यी निबन्धहरु पढ्दा राजेन्द्र कार्कीलाई हास्यव्यङ्ग्य लेखनमा नवप्रवेशी भन्नै मिल्दैन, यो फित्कौलीको ठहर हो । राजनीतिक व्यङ्ग्यले मात्र हाम्रो व्यङ्ग्य बजार ओगटिरहेको यो बेला कार्कीका व्यङ्ग्य निबन्धहरु हाम्रो सामाजिक जीवनतिर फर्किएका छन् । आधुनिकताले लपेट्न थालेको हाम्रो दैनन्दिन, फेरिदै गएका हाम्रा सोच, विचार र व्यवहारमा देखिने बिब्ल्याँटाहरुमाथि रमरम हास्यसहित मज्जाले व्यङ्ग्य बजारिएको छ 'खाइराइड मित्रका निबन्धहरूमा ।"

नरनाथ लुइँटेल

प्रधान सम्पादक, फित्कौली डट कम

"साँच्चै बेजोडको निबन्ध छ यो भाग्दैभाग्दै । हृदय हल्लाउने । यो निबन्ध पढेपछि राजेन्द्र कार्कीलाई सोध्न मन लागेको छ, 'तपाईं यत्रा वर्ष कहाँ भागेर लुकेर बस्नुभएको थियो मित्र ? प्रिय राजेन्द्रजीलाई यति भन्छु, जोडदार शब्दमा भन्छु, हास्यको व्यङ्ग्यको, विचारको मौलिकताको दार्शनिकताको लगायत अनेक क्षेत्रमा तपाईंको ज्ञान छ, क्षमता छ, त्यो अद्भूत छ । लेख्ने जाँगर छ, उर्जा छ, अध्ययनको हुटहुटी पनि छ । यो कायम रहोस् ।"

लक्ष्मण गाम्नागे

अध्यक्ष, सिस्नुपानी नेपाल