"शेर सिंहसँग महाभारतका सिडीहरूको कलेक्सन नै थियो तर तिनलाई शृङ्खलाबद्धरूपले नराखेकोले सिडी अन गर्दा कहिले पाण्डवहरू जन्मेको दृश्य देखिन्थ्यो, त कहिले भीष्म पितामह र अर्जुनबीच युद्ध हुन लागिरहेको । कहिले द्रौपदीको चीरहरण देखिन्थ्यो, त कहिले चक्रव्यूहमा फसेको अभिमन्यु !"

"म र विजय दुई दाजुभाइमात्र बुवाआमाका सन्तान । एम.ए. पास गरेर म लेखक हुनतिर लागेँ । विजय समाजको रुपान्तरण कलमले होइन, बन्दुकले हुन्छ भन्दै क्रान्तिमा होमियो । माओवादीहरू मूलधारमा आएपछि भने किन हो ऊ जनसेना त्यागेर कतारतिर उड्यो । त्यहाँको शहरी भिडभाडबाट टाढा मरुभूमिमा उँट चराउन थाल्यो ।"