शिक्षा पत्रकारका रूपमा स्थापित प्रकृति अधिकारीले एसएलसीको इतिहास र राणाकालीन शिक्षापछि दिल्ली सम्झौता शीर्षक पुस्तक लेखेका छन् । यो उनको तेस्रो पुस्तक हो । राणाकाल र शाहकालका घटनालाई बुन्दै विभिन्न ३० वटा सामग्री दिल्ली सम्झौतामा समावेश गरिएको छ । यसमार्फत इतिहास, राजनीति, कूटनीति, शिक्षा, समाज, मनोरञ्जन लगायतका विधामा कलम चलाएका छन् । चर्चित दिल्ली सम्झौता कागजी रूपमा भएको हो त ? वा थिएन ? यसमा तिनै कुरा समावेश गरिएको छ । गोरखापत्र दैनिकमा आबद्ध लेखक अधिकारीले गोरखापत्रको शनिबार विशेषाङ्कमा छपाएका लेखहरूको सङ्ग्रह हो दिल्ली सम्झौता । यस पुस्तकमा उल्लेखित कतिपय विषय र दस्तावेज पाठकका लागि नयाँ हुनसक्छन् । हुन त लेखकले पुस्तकमा इतिहासकार वा कूटनीतिज्ञका लागि यो पुस्तक होइन भनेका छन्, त्यसमा चासो राख्न चाहनेहरूका लागि हो भनेका छन् । यो पुस्तक पढेपछि त्योबेलाको समाज र तिनका दृश्य पाठकको आँखा वरिपरि घुम्न थाल्छ । पत्रकारिता शैलीमा लेखिएको यो किताबमा त्योबेलाको ‘हुकुमी’ तन्त्रको वास्तविकता बुझ्न पनि पाइन्छ । विद्यालय तहमा सामाजिक विषय अध्यापन गर्ने शिक्षकका लागि महत्त्वपूर्ण सन्दर्भ सामग्री हुनसक्छ ।
यो पुस्तक एडुसञ्जालले प्रकाशन गरेको हो ।