नेपाली हास्यव्यङ्ग्य निबन्ध तथा कविताका क्षेत्रमा साढे तीन दशकदेखि कलम चलाइरहेका लक्ष्मण गाम्नागे वर्तमान समयका एक लोकप्रिय र सशक्त व्यङ्ग्यकार हुन् । साढे दुई दशकदेखि नेपाली व्यङ्ग्य जगत्मा प्रभावशाली उपस्थिति जनाइरहेको संस्था सिस्नुपानी नेपालका संस्थापकमध्ये एक गाम्नागे हाल यसका अध्यक्षसमेत रहेका छन् । नेपाली हास्यव्यङ्ग्य साहित्यको क्षेत्रमा दिइने सर्वाधिक प्रतिष्ठित भैरव पुरस्कारबाट सम्मानित भइसकेका गाम्नागेका हास्यव्यङ्ग्य साहित्यमा कविता तीन र निबन्ध पाँच गरी आठ कृति प्रकाशित छन् । हास्यव्यङ्ग्यका अतिरिक्त दुई बालकथा र एक उपन्याससहित एक दर्जन कृतिका स्रष्टा गाम्नागेका झण्डै एक दर्जन सम्पादित कृतिहरु पनि प्रकाशित छन् ।

नेपाल साप्ताहिक पत्रिकामा झण्डै पन्ध्र वर्ष झटारो स्तम्भ लेखेका लक्ष्मण गाम्नागेको राजनीति केन्द्रित तीक्ष्ण व्यङ्ग्यहरुले भरिएको दलालशाला बाहाँ कृति हो |