Chakravyuh Ma Nepalko Jalsrot

महाकाली सन्धिलगायत स्मेक र पश्चिम सेती, एनरोन र कर्णाली चिसापानी, कोसी उच्च बाँध जस्ता जलस्रोत सम्बद्ध जल्दाबल्दा मुद्दाहरुबारे सरकार र राजनीतिक दलको नेतृत्व वर्गमा के कस्तो चासो हुँदो रहेछ भनेर पढ्न र बुझ्न चाहने नयाँ पुस्ताका लागिसमेत यो पुस्तक महत्वपूर्ण र उपयोगी छ ।

- दीपक ज्ञवाली, प्राज्ञ, नेपाल विज्ञान तथा प्रविधि प्रज्ञा प्रतिष्ठान (नास्ट) एवं पूर्व जलस्रोतमन्त्री

यस सामग्रीमा नेपालको जलस्रोत-राजनीति सम्बद्ध घटनाहरू सिलसिलेवार तवरले राखिनुका अतिरिक्त नयाँ पुस्ताले सिक्नुपर्ने पाठहरू पनि जताततै पाइन्छन् । साथै महाकाली सन्धिका विषयमा भारतीय राजदूत र राजदूतावासको सक्रियता करती रहेको थियो भन्ने प्रसङ्ग पनि सविस्तार पढ्न पाइन्छ ।

- डा. प्रचण्ड प्रधान, पूर्व डीन, व्यापार, वाणिज्य तथा जनप्रशासन अध्ययन संस्थान, त्रिभुवन विश्वविद्यालय र संरक्षक, किसान व्यवस्थित सिंचाइ प्रवर्द्धन गुठी

ऐनारूपी यस पुस्तकमा लेखकले जलस्रोत सचिव छँदा कति ठाउँमा हेपिनु, खेदिनु र खप्की खानु पयो ती सबै सन्दर्भ उल्लेख गरेका छन्। साथै सरकार के हो ? राजनीति के हो ? राजनीतिक पार्टी के हुन्? नेता के हुन्, कस्तो हुन्? उनीहरु कोबाट परिचालित छन् ? कसका अगाडि निरीह देखिन्छन् ? त्यसैको छनक पनि यो सामग्रीमा सहजै पाइन्छ तर पढ्ने धैर्य भने अवश्य चाहिन्छ ।

- भैरव रिसाल, वरिष्ठ पत्रकार

यो पुस्तक पढेपछि महाकाली सन्धिमा को कृष्ण, को कौरव, को पाण्डव अनि को शकुनि ? छुट्याउन पाठकलाई समय लाग्ने छैन। साथै विदेशी कम्पनी र दूतावासका कर्मचारीहरू नेपालमा जलस्रोतसम्बद्ध योजना हात पार्न केसम्म गर्न तयार हुँदा रहेछन् भन्ने बुझ्न पनि कठिनाइ हुने छैन। यसबाहेक नेपालको जलस्रोतका बारेमा अध्ययन अनुसन्धान गर्न चाहनेका लागि त यो सुनखानी नै हो ।

- सन्तबहादुर पुन, पूर्व विशेष अधिकृत (अफिसर अन स्पेसल ड्युटी), जलस्रोत मन्त्रालय