शताब्दी पुरुष सत्यमोहन जोशीया न्हापांगु मचा कविताया सफू ”चखुंचां हाःगु म्ये“ दुनेया कविता ‘छगू गामे’ च्वमिया शुरु ताहा कविता खः । नेपालभाषा मचा साहित्य थकायेत वय्कलं नेपाःया जक मखु विदेशया बाखंयात नं लिधंसा कयाच्वःगु थुगु कवितां क्यनी । विश्व प्रसिद्ध ‘दि पाइड पाइपर’ कवितायात नेवाः भाषां च्वयाः व उकियात ल्वय्क नेवाःभाषां लय् तयाः मस्तय्गु म्हुतु म्हुतइ घाइकथं थ्व कविता ने.सं. ११०३ न्ह्यः हे च्वयातःगु खः । थ्व कविता शिक्षाप्रद जुयाच्वंगु दु, नेपालभाषा मचासाहित्यया ज्वःमदुगु दसू क्यनाच्वंगु दु । थुगु हे म्येयात आः मय्जु अर्पिता शाक्यं साहित्यविद् सत्यमोहन जोशीया स्वीकृति व इच्छाकथं किपा च्वयाः पिथनेगु ज्या याःगु दु । नेपालभाषा मचा साहित्य विकासया निंतिं थुकिं तःधंगु तिबः बिइगु विश्वास जुयाच्वंगु दु ।