4.25 जदौ पाठकहरू, “बावऋ” उपन्यासको समीक्षा गर्न पाउँदा म एकदमै उत्साहित छु। सुरुमा त मलाई बावऋ नाम धेरै सृजनात्मक लाग्यो; यो नाम विभिन्न पात्रहरूको प्रारम्भिक अक्षरहरूको मिलन हो—बादल, वर्षा र ऋतु। पहिलो पटक मिलन सङ्ग्रौलाको कृति हातमा लिएर पढ्दा, “बावऋ” ले मलाई कस्तो गहिरो छाप छोड्ला भन्ने कल्पना पनि गरेको थिइनँ। मिलन सङ्ग्रौलाको लेखनशैलीले मलाई यति छुन सफल भयो कि यो कथा मेरा लागि मात्र कथा रहेन, एक अनुभव बन्यो। लेखकले बादल, ऋतु, र सपनाको त्रिकोणात्मक प्रेमकथालाई यति गहिराइका साथ प्रस्तुत गरेका छन् कि यी पात्रहरू वास्तवमै मेरा साथीहरूजस्तै लाग्न थाले। बादलको आफ्नै बुबासँगको सम्बन्धले मेरो हृदय छोयो। बुबाको माया, समर्थन, र कहिले काहीँ देखिने टकरावले मलाई आफ्नै जीवनको कुनै समयको सम्झना दिलायो। बादलको भावनात्मक यात्रा, उसको प्रेम, सपना, र संघर्षहरूले कहिले मलाई रुवायो भने कहिले हँसायो। लेखकले नेपाली समाजको द्वन्द्व र बसाइँसराइका घटनाहरूलाई आधार बनाएर प्रेमकथा बुन्दै कथा अघि बढाएका छन्, जसले गर्दा यो पुस्तक झन् प्रभावकारी बनेको छ। समग्रमा, “बावऋ” एक अद्भुत पुस्तक हो। यदि तपाईं नेपाली साहित्यका प्रेमी हुनुहुन्छ भने, यो पुस्तक पक्कै पनि तपाईंको मन छुनेछ, म विश्वस्त छु।