Mero Desh Mero Sansar

पञ्चायतकालीन समयको आँखी पत्रिका थियो- 'समीक्षा साप्ताहिक' | त्यसै साप्ताहिकमा स्व. मदनमणि दीक्षितले 'मेरो देश : मेरो संसार' स्तम्भ लेख्ने गर्नुहुन्थ्यो । समसामयिक घटनामा उहाँको बँदिलो लेखनका कारण बौद्धिक पाठकमाझ त्यो स्तम्भ निकै चर्चित थियो । कतिपय पाठकहरू उहाँको त्यो स्तम्भ पढ्नैका लागि अर्को हप्ताको 'समीक्षा' कहिले आउँछ भनेर व्यग्रतापूर्वक प्रतीक्षा गर्दथे ।

यो कृति सोही स्तम्भमा प्रकाशित स्व. दीक्षितका विचारोत्तेजक आलेखहरूको सङ्ग्रह हो । तत्कालीन समयमा लेखिएका भए पनि यी सिर्जना अहिलेको समयमा पनि उत्तिकै सान्दर्भिक छन् । इतिहासकार प्रा. महेशराज पन्तका शब्दमा "त्यत्तिको बँदिलो स्तम्भ लेख्ने जोडा नेपालमा अहिलेसम्म जन्मेको छैन ।”