लामो समय अमेरिका बसेर फर्केका अरूण शर्मा निकै पुराना लेखक हुन् । इन्जिनियरिङ, कानून र म्यानेज्मेन्ट अध्ययन गरेका उनी नेपालकै पहिलो माइक्रोचिप बनाउने इन्जिनियर पनि हुन् । उनको कथासङ्ग्रह 'कालो रात र एक पर्यवेक्षक तथा उपन्यास एक डायर सुशी र कन्चनजङ्गा २०२० को दशकमै प्रकाशित थिए । २०३० को दशकमा नै एक सक्षम युवा आख्यानकारका रूपमा स्थापित भइसकेका अरूण शर्माको 'मिसिगन ब्लुज प्रकृति र मानवीय भावनाको बडो रोमाञ्चक चित्रण गरिएको उपन्यास हो । यस उपन्यासको पहिलो भागले युवाहरूको मन स्वाट्टै तान्ने छ । विशाल मिसिगन तालको पानी जस्तै लेखक तरल बनेका छन्, पहिलो भागमा । यस्तो लाग्छ लेखक प्रेम लेखिरहेका नभएर प्रेम गरिरहेका छन् । र, यही बोध पाठकलाई पनि हुन्छ । पाठकलाई लाग्छ आफ्नो जोडीको हात समाएर ऊ पनि मिसिगन ताल वरपर नै छ । तर यो सुख स्थायी छैन । प्रेममा दुख बोकेर लेखक नेपाल फर्कन्छन् । तर यहाँ आउँदा उनको त्यो कोमल हृदयको प्रेमी पात्र साइन्स, साहित्य र बुद्ध दर्शन जोडेर आविष्कार, अन्वेषण, सृजना र जीवनका रहस्य खोतल्न सक्ने भएर आएको हुन्छ । अर्थात् दोस्रो खण्डमा भने उपन्यासमा जीवन र जगतका भित्री रहस्यहरू खोतल्ने प्रयास गरिएको छ । यहाँ पनि लेखकलाई पानीले तान्न छोड्दैन । मेलाम्चीतिर बरालिन्छ मिसिगन दुखेको पात्र । र, अन्ततः उपन्यास निक्र्योलमा पुग्छ, भौतारिनु, बरालिनु, गलत मानिसको संगतमा पर्नु र बाटो बिराउनु पनि जीवनको खोज हो । पछुताएर रोकिनु आवश्यक छैन, यी सबैको पनि कारण र महत्त्व हुन्छ जीवनमा । दुखमा होस् या सुखमा जीवनलाई रोक्नु हुँदैन, रोके सड्छ । बग्न दिइरहनु पर्छ, बगे सङ्ग्लिन्छ । यही भन्छ 'मिसिगन ब्लुज'ले ।