कार्ल मार्क्सको 'पुँजी' विश्वको सबैभन्दा प्रभावशाली आर्थिक, सामाजिक र राजनीतिक कृतिहरूमध्ये एक हो । यो केवल अर्थशास्त्रको पुस्तक मात्र होइन, बरू पुँजीवादी व्यवस्थाको वैज्ञानिक विश्लेषण हो, जसले मानव समाजको संरचना, श्रम, मूल्य, शोषण र वर्गसङ्घर्षको गहिरो अध्ययन प्रस्तुत गर्दछ । तीन खण्डमा विभाजित यो महान् कृतिको पहिलो खण्डमा पुँजीको उत्पादन प्रक्रिया, दोस्रोमा पुँजीको परिचलन प्रक्रिया र तेस्रोमा पुँजीवादी उत्पादनको समग्र प्रक्रियाको विश्लेषण गरिएको छ । यसको केन्द्रीय विषयवस्तु भनेको पुँजीवादी व्यवस्थाले कसरी श्रमिक वर्गको शोषण गर्छ र कसरी यो आफ्नै अन्तर्विरोधका कारण भविष्यमा पतनतर्फ उन्मुख हुन्छ भन्ने हो ।